لـ / الحل يا اللي في لحدهـا مسجـاه=قريبـة بعيـدة حولـهـا حــال
بعيـدة عنـا صباحـه وممـسـاه=قريبة منـا علـى كـل الأحـوال
ياليت من وايـق عليهـا بمثـواه=لعـل قبـره للمراهيـش مدهـال
خبري بها تضحك وهي عارفـه داه=ما شفت منها في مرضها تملمـال
تضحك تبي تسلى وهي داه بـرداه=تدري عن العله ولا تشكي الحـال
عساك من ربي تفوزيـن برضـاه=في جنة الفردوس يا حـي منـزال
ونا معك يـا قـرة العيـن ومنـاه=انا معك باسـم المثانـي والأنفـال
عقبك نضير العين لونه نثـر مـاه=من كثر نوحي والبكـا والتولـوال
عقبك عميت وكل دكتـور انصـاه=من كثر ماابكي لو يرد البكا غـال
بكيت حـول كامـل طـول فرقـاه=بكيـت واببكـي ولا نيـب مـلال
أيوب شاف الضر من حـر بلـواه=وأنا من البلوى تجرعـت الأهـوال
ما لوم حي جـاوب الذيـب بعـواه=واللي فقد غاليه يعول لـه اعـوال
غيري بكى وابكي وبيـح خفايـاه=الورق والسرحان ونسوان ورجـال
ناق تحن وكن فـي جوفـه رحـاه=من وجدها الناهي على نوق وجمال
تحـن للـذود الولايـف ومرعـاه=ونا على روحي حنينـي والاعـوال
تاجد كما وجدي ونا وجدي اكمـاه=أخاف من هرج العـواذل والانـذال
ثم الذي يصبر على حكـم مـولاه=يفوز من ربـه بتوفيـق واجـلال
وأنا سمعت وطعـت واستغفـر الله=وارجي ثوابه يوم توزيع الأعمـال
لكن نــجــــلا واسمها ما اقـدر أنسـاه=وجه المحبه والرضا وجه الاقبـال
مع الحضر والا مع البـدو مربـاه=يفـز قلبـي للاسـامـي والأزوال
أحب نـــجـــلا و اسمها كل مـا أقـراه=وأحب طاريها ولو قال مـن قـال
اسم يفوح بغالـي الطيـب معنـاه=يصيبنـي لا قيـل نجـلا تحـروال
لو أجحد العبرة فضح عينـي بكـاه=دمعي على الخدين دايم له اهمـال
دمعي مع العبـره مـع الأوه والآه=لو جت على عالي شمنصير ينهال
يعقوب من قبلي ترى حزنه اعمـاه=وانا عميت وجاري الدمع مـا زال
دمع ذرف من ثومة القلب ما اقواه=إلى انفجر دمع المعاليـق غربـال
وش لون أرده والمحاجيـر تنحـاه=إلى امتلت فاضت على كل مكيـال
واحزني اللي طاول القلـب يشعـاه=يشعاه مثل الطيـر بيديـن جهـال
الدار عقبك يا بهـا الـدار عفنـاه=ينعاف منـزال رحـل عنـه نـزال