جرح الزمن يبقى ولو طـاب أو طـال=وجرح الوطن أبلغ ..من اللـي نخبـره
العز طيرٍ والرجاجيـل لـه فـال=والدار تشـره يـوم .. هالعـز يشـره
والناس تدري والمطر تـوّ مـا سـال=والنـو يشهـد .. والمخاييـل صـدره
هي لابرقت مـن غـرة الليـل همـال=مزنٍ تحـدرٍ مـاه . مـا تـم صبـره
عيـن تخيـل وعيـن ترجيـه ينهـال=والارض قفـرا والمواعـيـد قـشـره
للصبـر حــد وللمعـاذيـر مكـيـال=ما زاد حد الليل مـن طـول فجـره .
مـن علـم التاريـخ ترديـد الاهـوال=ومـن علمـه إن الشفاعـه بتـمـره
صادق ولا نسمـع حكـي كـل قـوالا=صدق مـن وعـود المـودع لقبـره
اصدق من الدعوات والمـوت والجـال=لانهال من وجه الثـرى فـوق صـدره
هـذاك ميـت ودع الـعـم والـخـال=والعـز حـيٍ .. والفخـر حـي قـدره
للعـز مجـلاسٍ وللطـيـب مـدهـال=وللشعـر ميقـاتٍ وللوقـت دبــره.
مديت لـك يمنـى قصيـدي بالامثـال=تشدى نواصي الخيل في يـوم جسـره
أدري لنـا قـدرٍ وبالصـدر مـنـزال=وأدري بنـا عـزٍّ وطيـبٍ وجـسـره
حنا كتبنا نجـد .. والمجـد مـا مـال=بني رشيـد وعـزّ مـن عـزّ قـدره
إنا سقينا الشمس مـن جسـرة الـل=اليوم العطش يفتل .. على نجـد صقـره
وانا بنينا العـز مـن فـوق الاطـلال=هي من متى والنار .. تطفـي بجمـره
معاويه ..كيّـل علـى النـاس وأكتـال=وحنـا قطعنـا بالعـدل حـدّ شـعـره
لا نجامـل الحاكـم ولانجـامـل أزوال=وقصيدنا يصبغ علـى الوقـت حبـره
راسه جبين الشمس .. والصدق له شال=لا ما نحنى ..راسه على نتـف كسـره
والله ما نمـدح سـوى عقـال بعقـال=راسٍ بـراس ولا نـسـاوم بغـتـره
والله ما وطى الرشيـدي علـى ريـال=ما هو بخـل لا شـك .. للعـز سـدره
وثمٍ كتبنـا بالسمـا .. الـف مرسـال=حنا بني عبسٍ .. علـى حـدّ شـذره
سيـف ٍ يخبـره كـل عايـل وعيّـال=من يـوم مـادرات بداحـس وغبـره
تاريخنا أكبـر مـن الوقـت وان جـال=حنـا لنـا التاريـخ يشهـد بكـبـره
ابن اليمان الجـد مـن عهـد الانفـال=من غزوة الخنـدق ليـا بـاب كسـره
ومن وقعة النقعـه ليـا عصـر نـزال=يـوم ابيـض النيـات عجـل بشكـره
ومن الصريف ليا دعى النـاس خيـال=جينا من اقصانا علـى العهـد نشـره
ومن جاسم البـراك اذا العـز يختـال=حنا عسفنا الخيـل فـي يـوم جسـره
جدي ذعار الخيل .. والهيل .. والهـال=والرمح ..والبندق ..وصـوتٍ ونبـره
كبر نهار اعصيـر .. يـا الله يـا وال=إن أدبرت .. أو .. حلّهـا دون دبـره
حنـا وسمنـا كفـة الحـق لا مــال=بعض العرب عـن درب حـق يخبـره
لا ما شرينا عزنـا مـن هـل المـال=ولا .. .. ما كتبنا مجدنا فـوق قبـره
حنـا كتبنـا المجـد تاريـخ وافـعـال=وحنـا شرانـا العـز والعـز ظـفـره
ومن الكويت ليـا ثـرى نجـد والفـال=سيـد نواصـي خيلنـا مـا تخـطـره
لامـن كسرنـا بيـرقٍ ضـل واختـال=والله ليبطـي مـا لقـى سـر جبـره
ولامن جبرنا طايـح مـن فـم الضـال=مـا يقـدر الثقليـن عوجـه وكسـره
والله ورب البيـت مـازدت الاقــوال=قلت الصحيـح وقـل مـن لا يخبـره
بني رشيد وعـز مـن سـن الانفـال=اللي كتبـوا تاريـخ مـا جـف حبـره
لليـوم تقـرا عزنـا طيـب ورجــال=ولامن محا وجـه الزمـن مـا نعـذره
حنا ليا غبنا .. ضربنـا علـى هـلال=وجـه السمـا إسـمٍ ووسـمٍ وحمـره
من دم روح الشمـس والنـار والبـال=أوسـع مـن حـدود المصلـي بقبـره
لا ما يضيق الصدر لـو ضـم ولـوال=ولو ضم ضيم الكون مـا كـن عبـره
قبيلـة وحدودهـا شــرق وْشـمـال=وجنوبهـا يكفـي عـن حـدود بكـره
جمرة عرب .. والنار باقفـاي واقبـال=طيبٍ علـى الطيـب ..وشـرٍّ لكفـره
لا فلّـت احبـال ولا عقـدت احـبـال=أصغـر طفـل يـدري بعـزه وقـدره
لسيوفنـا ظـلٍّ بـه النصـر مـا زال=يمطر بنـا عـزٍّ علـى قـاع جسـره
والوقـت يكفلـنـا مقـيـمٍ ونــزال=للطيـب روح وللمواجـيـب زفــره
حنـا تنفسنـا صبـاحٍ بـنـا مــال=ثـم شربنـا الليـل غـدره وغــدره
حنـا عدلنـا كفـة الوقـت مـا نـال=منـا سـوى عـدلٍ تصافـق بصـدره
والشعر يذكرنـا علـى قـدر واجـلال=كـلٍّ ذكرنـا قبـل لا أخـط شـطـره
واليـوم كـلٍ لا ذكـر يذكـر الـحـال=الطيـب ربعـه ..ماظلمهـم بفـكـره
وهذا قصيـدي هيجنـة شاعـر قـال=بعض الحكي عن بعض صغره وكبـره