يا(مساعد ربيع) اضحك لاتزعلني=خلك ليا شفت وجهي يضحك حجاجك
لك الشرف يوم امثلك وتمثلني=يابحري اللي يضيع القيش بامواجك
اصير لك لقمه لا جعت تاكلني=وليا ذبحك الظما باصير هداجك
ابيك لا ضاق صدرك ماتجاملني=احب انا راحتك مااحب انا ازعاجك
خذني معك في سماك ولاتزللني=خل المسافه تحن لشوف ميراجك
وان شفتني طحت صححني وعدلني=حتى ولو كنت اجيب النور لاحراجك
تراي ثوب(ن) على كيفك تفصلني=تسلمه هامة التاريخ لابراجك
جادلت ناس(ن) على شانك تجادلني=وخليتها يوم فاح القدر تحتاجك
خذ هالقصيده رجا...بس ناولني=بيتين شعر(ن) جميلات(ن) من انتاجك

ياحمود كل الليالي ماتذللني=لو جيت ياحمود طيب وكنت محتاجك
علمي بصوتك مطر وشموس تغسلني=ياماحلا في نفاه العمر مسهاجك
لو في عيونك من الغيرة تجاهلني=يكفيني اني كسرت الظل بسراجك
اخاتل الليل لين انك تظللني=ياعزوتي واجلد الظلما بكرباجك
انا رفيق العزوم اللي تجملني=الله يحييك طبت وطاب منهاجك
اقلط على هامة الدنيا وقابلني=وعد الطويله وكن الشوك ديباجك
وان جادلك.. ناس عن فجر(ن) تزهملني=مد الرهاوي بمدخالك ومخراجك
وان بح صوتي وشفت الحمل مزملني=اركيت كفي على الشامخ من سياجك
قم شرع الباب للهقوات وازهلني=تبي تزين العلوم ويضحك حجاجك
اما دروب(ن) ورى الحروه توصلني=والا عليك السلام وعود ادراجك