يالسبع ياللي جيدن بالمطابيح = ماشفتلي ريسك ضنوة خساره
سافر دعايه والسفر ماهو بصحيح = هو يحسبن الكذب طيب وشطاره
اتلا الخبر سلم جميع المفاتيح = بعمان يذكر ساكننله عماره
خلا البلاد اللي بها هبت الريح = نجد العذيه ماينزل وقاره
مايطول الشارب كثير المراويح= الا لدرس اليوم ولا تجاره
عس العوض بعياله اللي زحازيح = دامه ذلف عس العوض في صغاره
واذا تعزه نبهه قبل لايطيح = قدام مخه لاتجيه استداره
وذا رفض بلغ وجهن مفاليح = موضفين حكومته بالسفاره
تسحبه قبل تشرح الجسم تشريح= عصابتن بالجرم فيهم شطاره
ويفضح بني عبس الزحول الطحاطيح = لاجيب ملفوفن بجسمه وزاره

استلم الرد من ابا الخليان

ياعمدة الاسياح ومحافظ السيح=ضنوة خسارة مايدير النماره

ابن شويلع مزبن الفطّر الفيح=يوم ان ولد اللاش ماازبن جفاره

يرعى الحيا ويفك ذود المصاليح=كم صد عنكم ياابيض الوجه غاره

واليوم قمت تحذ ّفه بالصلافيح=وتشب في رأس الفتائل شراره

كثرت ظنونك في بعيد المشاويح=وارخيت عينك ياصريح العباره

عجفاء سنام وسقتها للملاويح=متهاون ٍ فيها ولو هي عياره

مدري علامك تنطح الريح وتصيح=كسر الجمل ماتفيد فيه الجباره

اتطير فيه قلوب ناس ٍ مشافيح=تنذر على كسره وتدفع بشاره

مير اسحب ابساط الخبول السراسيح=واعط الوزير اشياء ترد اعتباره

قبل تهب الريح ويحمحم الشيح=وتطبق عقوبة نظام الوزاره