ياصاحبي بالكايده خلك جمل = ترى الرجال تشيل ماتشيل الجمال
اضرب لهم في مافعلت اروع مثل = بالفعل يمك وجه عيون الرجال
خل الجميع يطالعونك في خجل = وأنت اعطهم درس التفوق برتجال
قل ياشباب اليوم هذا اللي حصل = واللي يبي ياصل هذا درب الوصال
العلم لوهو من ورى كوكب زحل = ماهو على أهل الطايله صعب المنال
اللـه خلقنا للعباده والعمل = نسعى بمناكبها ورى كسب الحلال
والنوم هو ساس البلاوي والفشل = مامن ورى نوم الضحاوي راس مال
يانايمٍ في مضجعك قم واشتغل = ترى الرجل لابد يضربه مثال
اما يقال فلان والنعم الرجل = وإلا بعكس المدح شئً مايقال
خل الكسل وابدا حياتك بالأمل = يانائمٍ تحت المكيف والظلال
الوقت مثل السيف يمضي في عجل = أن ماقطعته يقطعك مابه مجال
العمر فرصه واستغله واحتمل = صبرك على نفسك ولا صبرٍ محال
أشغل حياتك في ذكر ربك وصل = مايندرى عن ماتحفيه الليال
ولاترافق الجاهل يزيدك في جهل = فعل اليمين أخير من فعل الشمال
والصاحب اللي كل ماينصح زعل = خل العوض في صحبته قطع الوصال
لابد ماربك يعوضك في بدل = أنت احتسب واللـه عليه الاتكال
وتمت وصلى الله على خير الرسل = اللي أمر في مسجده يأذن بلال