يابن سعد صار الخوي شي عادي = ان جيت تطمع فيه والا تغشّه
ماعاد يوجد للمخوّه منادي = يمكن خويك بالمهالك تطشّه
والا بعد يمكن تجيك البعادي = ان جازلك وضعه خطيرا" تهشّه
هذا زمانا" شفت فيه النكادي = يطير بومه والنداوي بعشّه
وان قلتلي وش مقصدي وش مرادي = قلت الك من جانا بعود ومرشّه
وانا احسب انه للمخوّه زنادي = واثره تعلّم في خويه وقشّه
وش رايك أقفي عنه واقول غادي = والزرع يقطع من نموه محشّه
حيثك فهيم بوضعنا باعتقادي = ومن يفهم الموضوع عادي يدشّه
واقبل سلامٍ فيه مسك وزبادي = اعداد مايمطر من المزن رشّه

قال الذي يحكم جميع المبادي = ولياحكمها ماتجي مستغشّه
يامرحبا ترحيبتن من فؤادي = يجيلها مع وشة الريح وشّه
تلفي على اللي للرفاقه ينادي = يشكي عليهم من رفيقه وغشّه
لا يا(علي) جنيتها بالأيادي = تمشي وماتلقاه قدمك تلشّه
الرايه البيضاء غشاها سوادي = واللي يشيل شعيل عود يطشّه
هذا اعتقادك وان بغيت اعتقادي = تصبر يالين المزن ينكف رشّه
وتبين ظلماها لو النور بادي = تو الخبر مدفون والارض هشّه
اللي نقص ينقص وما زاد زادي = بكره وجيهٍ سود ووجيه بشّه
الحر مايمرح بعش الحنادي = وانته (علي) ماكل دربٍ تدشّه
اترك هزيل القول واخذ الوكادي = واللي يمشّي وضعك اليوم مشّه
ساير زمانك لا تصير إنحيادي = وان كان ماعشاك سرحان عشّه
وليا انحدر دربٍ ودربٍ سنادي = دوّر مع الدربين دربٍ تخشّه
وراع الدسم لازم يجيه انتقادي = قبل الدسم عن الشفايا يمشّه
والخاتمه اعداد ماسال وادي = واعداد ما الرحال يرحل بقشّه
صلّوا على محمد شفيع العبادي = اعداد وبل المزن نزله ونشّه