هات القلم بكتب جزيل المعاني=ال شاعر (ن) يسبح بحور القوافي
ابني بيوت الشعر مثل المباني=امشيده مافيها عوج انحرافي
هاجوس شعري بالشعر ماعصاني=وسجل الابيات والبال صافي
شاعر ولا حسبت جور الزماني=شاعر مع شعار بالقاف وافي
يا بحر انا وياك والعمر فاني=وستر رب الناس بالكون ضافي
انت الجدي وانت سهيل اليماني=انت الجزيل الي يحل الخوافي
يا صاحبي فات الزمن والاواني=جهز جيوشك وانت رجل (ن) سنافي
في ساحه الميدان لا لا تعاني=خلك شجيع (ن) بالمواقف تشافي
انت وانا ومعنا طويل الاذاني=يا زينها زيناه والكيف كافي
ويفزع ابو تركي لخوه اليماني=ونحمي المواقف بالسيوف الرهافي
هذي رساله جاك منها البياني=يا شاعر (ن) يسبح بحور القوافي

ياسعد يوم القاف منك لفاني=فزيت له سرعه ورتبت قافي
يالشاعر اللي بالقصيده دعاني=ابيوت جزله ماعليها اختلافي
ابشر بسعدك ماخسر من نخاني=هذي تواقيعي وهذا اعترافي
لو ولعت من كل قاصي وداني=وانا بجنبك ياسعد لاتخافي
مثل جبال طويق ثابت مكاني=لو عودت سود الليالي عجافي
وان كانها بالشعر ماني جباني=تلقا البحر في كل ميدان لافي
جزل البيوت اللي نطقها لساني=يكفيك عن قول الصقر والخرافي
نرقى سنود ولانحب الطماني=وهذا عن العربان ماهو بخافي
وشعار عبس معربين المجاني=سراجهم بالمجد ماهو بطافي
ياما اتحفونا من جزال(ن)اسماني=ماهي من بيوت القصيد الخفافي
وصلوا على نبينا ياخواني=اعداد من لبى بمكه وطافي