يا ناشد(ن) عن موقفي وانطباعي
اقول حلمي ضاع من غير تفسير
طوّعت لدفوف البنات استماعي
وكذاب من هو ما يحب الغنادير
ارخيت لرياح المحبه شراعي
ظنيت ما بالبحر موج وأعاصير
إي والله أني ذقت حب ووداعي
وغنى (طلال) لمثل حظي (مقادير)
وحب الشرف مالي بغيره مساعي
إن وردت الشينه أخذت المصادير
ماني من اللي بالحياة اندفاعي
أعرف قدر نفسي بكل المعايير
من بادي أيامي وهذا اقتناعي
الطيب كسب(ن) للوجيه المسافير
ما أخص به أهل النفوس الجياعي
اللي بجمع المال مثل المناشير
اللي خذوا للجود (طلق اصطناعي)
مات الجنين وللأسف ما حصل خير
حنا على مد الأيادي سراعي
نمدّها بالجود من غير تفكير
نمدها بالضيق مد الوساعي
وبعنا المواتر والذهب والمغاتير
لو نحسب اللي فات منا وضاعي
إن كان تملا من عطانا قناطير
ومن يزرع المعروف لازم يطاعي
ذروة سنام المشيخه ذيك يا آمير

من كثر صدماتي بناسٍ عزيزين
صرت أتحرى صدمتي من ظلالي

مع الليل يا كثر الطواري وقلّ النوم
عيوني الشقيه مرها الضيم و أسهرها
خفايا السوالف انفضح سرها المكتوم
طعون الليالي كل ليله أسامرها
ولو إنها حاجه بسيطه تمر بيوم
بقفّل عليها ضلوع صدري وبنكرها
ولكّنها - غلطه - قويه - تهد عزوم
ولا ودي بصدق المشاعر أكررها
بغيت الجماله وأفحموني بثقل اللوم
كلوني بشرهات القفا دون ابررها
ولا يفيد رفع الصوت ل قلت انا مظلوم
تزيد الشماته بينهم قبل ما أنهرها

صاحبي لا يزعلك قل اهتمامي
يا كثر ما خيّبت لـ ايام !! ظني

ادري مقّصر معكْ لكن / نظامي
كل شي !! أهتم فيه يضيع مني